自稱父母的網民分享︰「現時兩夫妻加大仔同大仔女友同住，一家四口，細仔去外地生活。供樓每月一萬，每日晚餐家中自煮，大仔每月入約$30,000，父母要求大仔每月畀$8000家用（父母全包水電煤、上網、雜費、差餉、地租、管理費），大仔話父母咁樣做非常刻薄、自私，想榨乾晒佢啲錢。我只係按每月家庭最低消費$16,000計，叫佢畀一半，佢話層樓唔係佢嘅，佢冇理由要畀埋供樓條數。我叫佢畀$6000，當交租每晚唔煮飯。佢覺得貴，話出面租房好平。我都想知咁樣要求，係咪真係好刻薄？係咪太過份？」

網民A︰雖然細仔喺外地生活，佢多多少少畀啲，當一個月$2,500，大仔畀$6,500 ，可能好啲。

網民B︰叫佢用6000出面去租房啦！

網民C︰一個人住$7,000，兩個人住$8,000唔過分啦，但而家一齊住咗兩年，可能你兒子有結婚壓力，要儲蓄。你係爸爸定媽媽? 不如問下他們未來幾年有咩打算？

網民D︰正如這裡大家所說，$8,000-$10,000都合理，在外面自己租都做不到。但你也說，也不真是靠這個開飯。老實相差只是一兩千元，不值得大家不開心。

始終一家人，不如打開來說，可能更好。你可以直說你不滿意他說話的語氣，但也可以問他未來幾年的計畫，可有甚麼大家可以配合，關心一下他們，可能大家更容易取得共識。

網民E︰搵$30,000畀$8,000，同女友住，包食晚餐，無收多啦！如果你唔等錢使就照收，然後幫佢儲$6,000仲好。

網民F︰得，佢覺得買餸平，叫佢以後負責買餸，收工去超市買聽日餸，記得要買埋調味料，買足一個月，keep單自己計吓數。

網民G︰$8,000？租都唔止啦！你大仔有本事請自己搬出去！

網民H︰咁你生個仔出嚟嘅目的，係唔係為咗每個月賺錢畀你？當然你冇責任養埋佢女朋友，不如你叫佢哋搬出去啦，無謂為錢嗌交。

網民I︰叫佢去出自己住囉，完！

網民J︰簡單，大仔佔用屋企資源，細仔無，兩個都無畀家用，立張平安紙，百年歸老時，因生前已畀大仔住屋福利，所以屋歸細仔擁有，大仔唔好問點解，因為佢已經承認樓吾會係佢嘅，父母有權點分，同時要佢哋兩個係平安紙上簽署，無交嗌！