「公司有個女同事好慳，慳到我覺得佢有少少貪小便宜，返工日日帶飯，每日臨收工會裝一大枝水返屋企。呢位同事非常瘦，如果唔係見佢每日有食飯嘅話，會以為佢無錢開飯。

有日朝早返工嗰陣撞到佢，我衝口而出問佢點解日日帶飯，就算一起叫嘢飲，有人請佢都唔飲。女同事就答我，因為佢要儲錢供佢細妹讀書。女同事想佢細妹專心讀書，所以叫佢細妹唔好返兼職，女同事會包埋佢阿妹嘅日常開支，屋企有啲原因，搞到得返佢一個人可以供佢細妹讀書。女同事話其他人請都唔飲嘢，係因為佢唔想畀人覺得佢貪小便宜，要人請先一起飲。

我問佢咁樣唔辛苦咩？佢話辛苦，但係阿妹係佢唯一最親嘅人，就算幾辛苦都會堅持落去，好彩嘅係佢阿妹讀多年就畢業，同埋有消費券幫補吓，可以同阿妹食好啲，如果唔係佢哋都無咩機會可以一齊出街食飯。見到佢咁慘，如果第時佢阿妹唔搵嘢做靠個家姐養嘅話，唔知女同事會唔會崩潰……」

網民回應：

A/佢個妹喺香港讀大學，應該唔會好大負擔，借政府學生貸款，應該夠

B/呢位同事值得尊敬

C/令人覺得好滾動

D/呢啲係家事，不過我唔明你點解你要諗到個結局咁，最多諗到個妹飛黃騰達，唔認家姐

E/你係唔係見個同事咁慘，想幫佢分擔吓

F/真係好值得學習

G/家家有本難唸的經，無人鍾意慳家慳到要貪小平宜，你同事無影響到其他人，咪當無事發生囉

H/好女仔，娶得過

I/關你咩事啫

J/如果個妹係識諗，讀到大學都可以搵份唔影響讀書嘅Part time嚟做吓，唔使個家姐咁辛苦

K/或者樓主你有時請吓佢食飯，大家都開心

L/你同事慳係佢嘅事，我覺得樓主你好似過份多事