事主：「有意入行做小學老師，想了解吓做老師嘅辛酸，做定心理準備。睇過唔同嘅討論區，普遍都係話老師工時長，有返工冇放工，星期六日有時都要帶隊，放工返到屋企仲要備課改簿，仲要應付家長，校長，仲有學校行政工作…歡迎補充。想知道係咪日日都係咁，定係有時先係咁。直資學校或者國際學校會唔會好啲？歡迎各位老師吐苦水，分享吓自己日常，做老師最開心嘅事都得㗎～」

網民：「好睇學校。但工作量嗰啲係睇個校長嘅行政手段，有學校係可以準時放工，冇人OT，但因為上到位嘅都唔係好人，所以好多時候都話知班老師死，所以就要先預咗OT先。小學就工作量一定冇中學咁大，係攰咁解，星期六有時要帶活動（但會計校內時數），改簿嗰啲有答案，你熟手可以快快改好。補充一句先，其實如果全部老師合作去校董會投訴係可以拉個校長下台，但通常做得校長都有咁上下人脈，都好識玩手段。所以入到去覺得唔對路就自己準備下年揾第二間。」

網民：「想輕鬆老師從來都唔係選項，有心教直頭會好辛苦，如果你一心為份糧同輕鬆，更加唔應該做老師。我做中學嘅日日朝早7點半做到夜晚7點家常便飯，大把老師返到屋企都做緊嘢（夜晚/假期啲email都未停過、仲有帶簿改）每日都驚第日唔知醒，心理壓力好大，唔係你想請假就請假。本身一日上堂、備課印嘢、改簿改文追功課、班主任堂、應付學生、家長已經佔晒你一日嘅時間，撞上一年幾次小測或考試，每逢出卷忙到你飯都唔得閒食。除班主任外，自己行政小組都一大堆行政工作做。中學又多活動由頭到尾都係老師去策劃，仲有老師開會、輪流當值等。做學生係唔會明，但為學生嘅，辛苦係值得嘅，我靠份滿足感同份過得去嘅糧支撐落去。」

網民：「冇一份工唔辛苦。」

網民：「小學唔知啦，中學今年換咗好多人，好多學生走咗，同時好多有心教書嘅同事同啊頭走咗，嚟咗啲嚟搞辦公室政治嘅人，開咗學兩個月，我覺得自己心態崩咗，同埋教學熱誠每時每刻都喺度減少緊，個人好大壓力，當同事走嗰陣，其實我都好想走，但當身上揹住一班準備升F.6嘅，我走咗咁班學生點好，中學老師辛苦在於其他工種你話quit真係可以隨時quit。但如果你想做一個好老師，你背負嘅責任感其實好重。」

網民：「其實做老師辛苦唔係問題，最煩係啲道德枷鎖，個社會要老師係聖人，否則就係教畜，好多嘢都唔做得，講粗口、落bar飲酒、食煙、紋身。男仔甚至染髮、電髮都唔得，喺街做啲乜又驚隨時被人見到，拍拖都要小心啲。」

如此看來，老師工作最慘的是感覺一直在工作，上班與下班之間沒有邊線。即使他人看來高薪又輕鬆，實際上有很多瑣碎事(dirty work)去處理。閒時外出，也要害怕被家長和同學看到自己「不專業」和「不妥當」的一面，例如喝酒和抽煙，連拍拖都怕被人看到，要真正成為一個好老師，強烈責任感少不了。