事主：「已經轉過幾份工，好似無一份啱自己。上一份工作量少啲但濕碎嘢多，人工普通，同事之間氣氛麻麻。依家呢份人工唔錯但工作量勁重。仲要追數，追唔到就會畀老闆同事嘈。其實我都想除咗𢭃人工之外可以做好份工，獲得一絲滿足感。咁樣諗係咪太奢侈？

自從返工之後，起身第一時間淨係諗到有咩做漏、有咩做錯，亦都試過因為咁樣失眠。有時覺得唔係份工問題，係自己心態問題。人哋個個放工Happy Hour，我就喺個腦開自責大會，同朋友出街都繼續諗。成日都會怪責自己好粗心。其實我都知道要放開，但釋懷真係好難。好似好耐無畀人讚過，覺得自己都好難欣賞自己，一諗到就想喊。朋友其實好好，會同我分析、安慰我，一呻完已經舒服好多。但感覺一返工就畀份工綁住，Quit先可以拋低晒所有責任。」

網民：你有提到想要做好份工嘅滿足感，會唔會係跑數工本身唔啱你？

人對周邊嘅事物掌控得越少，就越難得到滿足感。跑數、內容創作者呢啲工自己可以掌控到嘅嘢本身就好少，所以壓力比正常人大。

網民：我之前都係咁。壓力大到長期腳軟，飯都食唔落。

網民：最近睇緊《被討厭的勇氣》呢本書，反思緊點解好似總係接納唔到自己，總係喺其他人嘅期望下尋找價值。

網民：見識過身邊工作態度輕鬆嘅人都係醒目底，乜都拆得掂，一切喺佢地掌控之中先咁不慌不忙。

網民：成日左諗右諗只係浪費精神，寫低諗完要做嘅嘢，有初步總結，一般都會輕鬆啲可以有返多啲自己時間。

網民：有時過分執著同介意人哋點睇，內心先會掙扎懷疑自己。

網民：一係搵份無咁大壓力嘅工，你呢種心態注定做唔到高層。

網民：如果係你做錯嘢，人哋提完你就改，錯一兩次其實好閒。其實好多嘢都可以補救，唔會錯一次就無得返轉頭。

網民：做咗一段時間都可以轉環境，唔一定要放棄晒全行。搵返個自信，同同事夾到先做耐啲。

網民：佩服做嘢掂又正面嘅人，生活仲有咩事會難倒佢哋？