事主：「都唔知佢真傻定係假傻，一開始成日都喺夜晚11點幾12點講公事，因為我哋每日都有啲item要報告，通常每朝早8點幾近9點先會報自己當日會講啲咩題目，佢就前一晚講定，驚死有人同佢搶咁，都算啦！但有幾次連續幾日，佢都凌晨先send訊息喺group度，大佬呀！就算未瞓，見到都真係燥，有咩咁急要呢個時間講呢？之後我哋有同事喺group度叫佢唔好再咁夜send訊息，好多人已經休息。以為佢學乖啦，靜咗幾日，之後又唔知佢發咩癲，變咗清晨5點幾6點就報題目！咩事呀？係咪唔使瞓？定係佢太大壓力？都唔知佢係想扮勤力定專登鬥氣煩住大家……」

網民：「聽到都嬲！我都有個咁嘅同事，好似日日喺度試大家底線，睇吓可以接受到幾時send咁，真係好煩厭！」
網民：「如果佢係真傻都幾可悲，乜而家啲人咁樣做嘢？好似完全感覺唔到大家嘅不滿，活喺自己嘅世界入面咁。」
網民：「其實事主同其他同事又使乜咁燥呢？你靜音或者用過第二張卡咪咩事都冇。何必令自己咁激氣呢？」
網民：「非常自我中心，其實佢係咪有病？」
網民：「會唔會佢覺得工作真係好大壓力？做到咁夜又或者咁早起身……同上司反映吓，了解一下佢真正嘅問題先最直接。」
網民：「我覺得事主都唔使太上心就真，mute咗佢，由佢講，影響唔到大家，佢又開心，做同事都要調節吓嘅。」
網民：「講完唔好深夜，咁今次講埋唔好清晨囉，發現而家好多人都要講到咁清楚先得，比較唔識變通，亦都唔識了解其他人嘅情緒，真係要慢慢教。」
網民：「佢係咪FG？覺得年輕人先會咁樣挑戰大家，想知後續。」
網民：「覺得之後個同事就會覺得大家針對佢，然後辭職，一了百了。」
網民：「真係唔明啲人點解唔明呢啲行為真係犯眾憎，你自己鍾意返工，唔好迫人都陪你喺呢個工作情緒入面。」