【職場文化】公司成日要求做粗重嘢男事主：想反面唔做⋯⋯

上一代勞碌工作風氣盛行，打工仔相信只要任勞任怨、肯搏肯捱定會有出頭天。只要老闆金口一開，任何職責範圍以外的工作都願意赴湯蹈火。隨著時代變遷、職場文化變化萬千，在公司肯搏都未必有出頭天，新生代的打工仔只會「堅守崗位」，不再奉旨替老闆「執頭執尾」。最近就有網民於香港討論區發文，指自己本身擔任文職卻不時被老闆要求負責粗重工作，忍無可忍下終向老闆攤牌。事態究竟會如何發展？

即睇事主經歷：

樓主：交代下背景先：男性，純文職，Editor。入職公司1年半，簽咗死約要做到下年年尾。

樓主：但最近老闆叫我做好多粗重嘢⋯⋯

樓主：無請清潔姐姐，每個同事個位嘅垃圾桶都會載食完嘅外賣盒、鼻涕紙巾，滿咗就掉晒入門口嘅大紙箱。老闆每隔兩日就叫我收工前拉去隔離垃圾房。

樓主：跟住次次隔兩三日左右就搵我搬箱8-10Kg嘅嘢⋯⋯

樓主：Whatsapp同咗老闆講唔會再做粗重嘢，清潔呢啲嘢留返畀其他人做！

樓主：老闆覆我話我係最低級：「叫你做就做。公司大部分同事都係女性，得我一個男仔，唔通叫啲女仔做咩？」

樓主：重嘢又我做、掃個地又叫我做。有無搞錯？

樓主：我想拒絕唔做呢啲嘢，但又驚佢炒我之餘仲叫我賠錢⋯⋯

樓主：可唔可以當面拒絕唔起身算數？如果拎醫生紙話整親佢一樣知我係玩嘢。

樓主：而家諗起佢聽日或後日又叫我做呢啲嘢就嬲到爆！

即睇網民回覆：

網民：攞份約上勞工處問吓，叫佢畀啲意見你參考。

網民：你咁樣同老闆講嘢，結果一定會咁⋯⋯香港公司無乜保障，之前舊公司因為清潔姐姐走咗又未請到人，都有叫個職員洗廁所。

網民：你有通知期嘅話一個月通知咪走得！合約係請你做Editor，工作範圍外嘅工作你絕對可以拒絕。如果佢因為咁炒你，你可以去搵勞工處。

網民：你都無搵定後路就同老闆開火，咁只會做炮灰㗎啫⋯⋯

網民：你唔反抗就只會畀人踩到上心口，得閒就去刨下僱傭條例啦！

網民：下次佢再叫你搬嘢時扮整親條腰，兇佢話要報工傷，睇下佢仲夠唔夠膽玩你囉。

網民：如果經常要你咁做你可以Say No；同樣佢都可以炒你，但佢要賠一個月糧。

網民：真係整親條腰嘅話，可以攞醫生紙Claim佢工傷，請返三幾個月病假等佢得不償失！

網民：你咁同老闆講嘢太衝動喇，完全無增益。不過你同老闆都扯爛咗塊面就講咩都無用啦⋯⋯

網民：最低級就要做埋清潔，咁清潔份人工有無計入你度？依家唔係暫時性，係你老闆孤寒唔請清潔！

僱員可否拒絕職責範圍以外的工作？
根據《僱傭條例》，如僱主單方面更改僱傭合約主要條款（指使僱員負責職責範圍以外的工作），僱員可以「不合理的更改僱傭合約條款」為由向僱主申索補償。僱主不能單方面更改合約條款，除非僱主擁有條例規定的「正當理由」，否則更改僱傭合約條款就有可能等於變相解僱。雙方同意改動才不會有違僱傭合約之嫌疑，假設某職員受僱時履行的職務是行政管理，但公司受疫情影響希望員工同時幫忙接聽電話以及清潔，超出合約上的工作範圍，那就有商確餘地。

衰老闆手段百出，即刻睇睇有咩方法應對。