「我收到自己份Appraisal，上面竟然寫住『唔係你收幾多錢，就做幾多嘢』，令我覺得好心寒。所以好想上嚟請教吓大家，我應該點做好。

我由去年開始，就入咗而家間公司做，做行銷企劃相關嘅工作，返工從無遲到，收工都無得準時走，只可以睇上司面色做人，佢未收工我真係唔敢走，平均每日都要夜晚6點40分至7點20分左右先走得。雖然表面話係6點，但從來都未準時走過，報返上去話自己OT，要求加班費，就會畀人捉去傾偈，因為其他人都無報過上去。

由於公司請唔到新人，所以喺公司嘅都係有一定資歷嘅員工，佢哋幾乎都會留到好夜，至少都加班一個鐘（可以話大家奴性都好重）所以對比之下，我就顯得好懶（我上司真係咁講，話我太在乎收工，唔在乎做嘅嘢），所以佢喺Appraisal先會咁寫。

我真係覺得好受傷，我應該點做先好，我人工又唔係多，要做到咩程度先夠？因為我Appraisal啲評語好差，所以我無人工加，仲要被人話做嘢唔認真，明明我放假都有幫手，啲工作Message都有覆，仲要收工出去送同拎公司嘢，無一日準時收過工，我當係學嘢，但換嚟嘅只有等收工嘅懶員工形象，難道係我太玻璃心？」

網民回應：

A/拎一分錢做半分事，佢係話你太認真，唔應該咁努力虐待自己

B/係我嘅話，我唔會即刻轉工，我會每日6點準時收工，再慢慢搵工，然後帶支錄音筆以備不時之需，唔好咩都讓晒公司，規定點做就點做，做好最壞打算會隨時被炒，既然都諗住轉工，怕咩畀人炒，無嘢要驚喎，拎住支錄音筆，錄幾句難聽嘅說話，被炒的話記住拎證據，睇埋法例相關

C/本來就係拎幾多錢做幾多嘢，去返工唔係做善事，佢哋奴性重，唔代表你都要，佢哋無能力離開間公司，先會咁樣勒索你

D/換過份工啦

E/係你入錯公司，炒老細魷魚係你最好嘅選擇

F/公司咁多，唔一定要留喺度嘅，搵過間更好嘅公司啦

G/份糧唔高，仲要無得準時收工？

H/係公司問題，我而家仲係新人，每日都唔敢準時收工，到6點就會坐喺位度搵嘢做，呢個時候上司同帶我嘅同事就會嚟趕我收工，話夠鐘叫我盡快收工，叫佢唔好諗工作上嘅嘢

I/長期請唔到人，就係呢間公司嘅把柄，係佢哋要怕你會辭職，唔係你怕佢哋，所以你就跟隨自己嘅原則，反正要對你點，炒你都係佢哋理虧；可以的話學下跳糟，收工就準時走，就係因為啲人太無原則，先會令公司覺得唔畀加班費天公地道。放假唔好覆Message，要送或者拎公司嘢，都返工先去

J/咁樣嘅公司，仲夠膽評論返員工轉頭，準時收工搵過份工

K/你覆佢話，我無諗住升職加人工，所以唔好理我

L/同佢講：我嚟返工賺錢，想要忠誠搵過隻狗