事主︰「我發現討論區嘅網民講起結婚，都會話『女仔出去賺錢，計埋都唔係特別化算，不如乾脆留喺屋企仲好！』我分享吓自己個人經驗，當年我同老公未婚，同居嘅時候，佢人工比較高，因為我當時從事教育，工作係以量計薪，啲堂越排越少，嗰陣我有時間多出嚟都會分擔吓家務，幫手煮吓飯，盡可能發揮吓自己嘅經濟價值，但當我買餸唔夠錢，問對方拎嘅時候，佢偶爾就會畀說話我聽，好似『吓！無幾耐之前咪畀咗你！』

家務嗰陣明明傾好咗，我煮飯佢洗碗，但當佢唔想洗嗰陣，佢就會話，『我咁辛苦返工賺錢，仲要我返嚟做家務！』我只可以話大部分賺錢返嚟養家嘅人，都好容易出現一種心態就係『我好辛苦賺錢返嚟，你做牛做馬好應該，因為一分錢都無賺過返嚟。』

而負責主內嘅人，覺得「係因為我幫你打理呢頭家，你先無後顧之憂，可以喺出面做嘢。」面對主內嘅另一半拎錢嘅時候，唔畀面色佢睇，唔畀說話佢聽，呢個機率實在太低。之後我就盡量都唔會伸手問佢拎錢，自己賺錢，講說話都自信啲！嗰啲『我養你就好，你就留喺屋企啦』呢啲說話，真係聽吓就算，重點唔係人工嘅多與少，而係人生在世呢啲嘢真係話唔埋，就算你同另一半恩恩愛愛過一世，總可能會遇到意外，一個喺屋企待業十年嘅人，再返出社會做嘢，真係好難，希望大家婚後都可以有自己嘅工作同生活，喺做人地老婆同新抱之前，先要做好我哋自己！」

►最新【行政 / 文職】職位空缺

網民回應：

A/ 真啊，而家男女工作能力都差唔多，除咗女士有咗真係唔方便返工，或者要養好身子之外，都應該一起返工
B/ 我好認同，女人係需要工作帶來嘅安全感同成就感，呢種自我實現嘅需求應該要被滿足，夫妻應該互相支持對方成長，而唔係要其中一方犧牲
C/ 呢啲觀念應該由細開始教育
D/ 我覺得要睇你同伴侶人工差別大唔大，如果我老公賺得多我好多，我出去做嘢都只係浪費時間，不如喺屋企照顧佢同仔女仲好
E/ 對我嚟講，呢一個係生活重心嘅問題，無法接受我嘅生活重心只有我老公同個仔，我見過朋友係過呢啲生活，即使唔缺錢，唔需要問另一半拎錢都好，留喺屋企照顧頭家，都好容易令自己睇法都變得單一，呢種生活好可怕
F/ 男女家用AA制，辛苦生個仔出嚟，佢就跟老豆姓，除非唔使生仔，唔係都唔會有平等嘅婚姻
G/ 我覺得問題唔在於人工多少，所以唔使做嘢嘅問題，而係你同對方萬一有爭執，或者佢出軌，咁你可唔可以離開對方嘅經濟因素，太多因為無工作能力，要為家庭而忍嘅人，如果個女仔屋企本身有錢，唔使做嘢都應付到就另一件事，但呢啲都係少數
H/ 無咗份工就變成「都係我喺度養你」，雖然我自己之前老公係一直養家，而佢都好自豪賺錢養我，但十幾年嚟，工作遇到困難嘅時候，壓力大難免唔會平衡，加上因為用佢辛苦賺嘅錢，我都會應使則使，慳住慳住；後來我都出去做嘢，只係每個月拎人工，呢種成就感就唔係家庭主婦會有