事主：我條team有個project就嚟到deadline，但我哋因為人手不足，完全冇同事有時間跟份project。如果照正常程序嚟講，係要send email畀跟進部門，睇吓佢哋批唔批准我哋延期。但有一日，team leader竟然口頭叫我話份project到期都唔好交，亦都吩咐我唔好問有冇得延期，佢完全冇解釋過任何嘢，但我feel到如果跟team leader指示做嘅話，我應該會畀佢跣到好大鑊。

我而家諗到嘅自救方法係將team leader口頭同我講過嘅說話，打做email send 畀佢叫佢confirm，然後再CC埋畀老細，白紙黑字留低record。或者我直接唔理team leader嘅指示，自己send email問跟進部門可唔可畀我哋延期。但我點做都會得罪team leader，好驚之後會同佢面阻阻。明明佢先係始作俑者，點解要咁樣玩我同跣我……

網民A：打定辭職信，搵定第二份工啦！

網民B：你用email問team leader嗰陣唔使CC畀老細住，佢答咗你之後，你覆返team leader話收到嗰陣，先再BCC畀老細。

網民C：你直接越級同老細講，再要求調team，呢啲team leader跟多佢一排，遲早玩到你出事。

網民D：首先你要搞清楚成件事，一：佢跣你係未發生嘅事，佢唔一定跣你；情況二：佢真係跣你，你直接同老細講係team leader叫你咁做，畀返個責任佢自己處理返。

網民E：你send email就等於直接同team leader反面，你WhatsApp問咗佢先，記住cap圖，之後再私底下搵高一級嘅上司問問點處理好。

網民F：如果佢認真想跣你嘅話，辭職應該係唯一出路，就算今次畀過安全度過，難保佢下一次又咁玩你。

網民G：其實佢作為team leader，成個project出事佢都唔會獨善其身。佢有義務同責任管理好成team人。如果出事嘅話，老細第一件係質疑佢管理同工作能力，然後你同team leader一齊畀老細鬧！

網民H：照問跟進部問可唔可以延期先，跟住你扮唔記得咗team leader口頭講過同你講過，當佢問你嗰陣就不斷講對唔住。

網民I：出事你有冇後果先，使唔使賠錢或者有法律責任？冇嘅話咪信team lead 同埋搵方法留低record用嚟自保。

網民J：可能成條team文化係唔興問有冇得延期，或者啲project係可以例牌遲交嘅。如果你白紙黑字畀晒老細或者管理層，佢哋就唔可以再隻眼開隻眼閉，逼住一定要處理。我係你就問清楚其他同事係咪有呢個習慣。

網民K：可能係老細落咗order要炒人，所以team head用呢個方法令到公司有藉口炒你。