事主：我而家32歲，返緊一份朝9晚5嘅文職工，間唔時仲會返吓part time保安，暫時每個月收入有$22,000。我目標係40歲搵到一份有$30,000月薪嘅工。雖然好多朋友叫我試吓做地盤或者考護士，但因為我隻手曾經傷過，唔可以長時間發力，所以都唔會考慮。為咗可以賺多啲錢，所以就想進修或者讀返書，幫我可以易啲轉行。所以想問吓大家有冇咩好嘅進修課程，可以讀完幫我賺到多啲錢？

網民A：老實講，除咗你提過嘅地盤、護士呢啲工種，應該無工可以一讀完就即刻有$30,000人工。

網民B：如果你係為咗賺錢而讀書，又冇心儀科目想讀就不如算啦，浪費時間同錢。

網民C：而家呢個年代，做藍領好過做白領，人工又高過白領。

網民D：進修完其實唔等於多咗機會，但會幫到你把握機會，最緊要有心唔怕遲。

網民E：加油，我都係30幾歲先嚟讀返書，如果你半工讀嘅話，預咗會好辛苦。

網民F：我會建議你功利啲看待讀書呢回事，我自己就覺得對而家嘅你成本太高啦。最高成本係時間，呢2至3年會完全冇時間發展自己興趣、陪親人同去玩。再者，你都未清楚自己想讀咩，讀完之後張證書又唔肯定對你有冇用。

第2樣係學費，你要返幾耐工先可以cover到學費？你話目標係40歲前搵到$30,000，我係你嘅話一係轉工嚟加薪，一係就返工表現好啲，畀上司知你有能力而升你職。

網民G：你直接去考政府工會唔會易啲？每年會加人工，做夠幾年又可以跳point！

網民H：想知有邊個行業會請一個無任何相關經驗嘅中年人，仲會出到$30,000人工畀你？

網民I：嚟到30歲呢啲年紀，讀書主要目標係提高自己工作上嘅技能同知識，唔再係細個求其揀一科嚟讀。樓主如果真係未諗到想做邊行、有清晰嘅career path，就亂報啲degree嚟讀，我真怕你嘥錢同時間呀！

網民J：我26歲嗰陣決定讀返書，畢業嗰陣都已經30歲，然後冇做返相關嘅行業，人工同未讀之前差唔多，諗返都覺得自己好嘥時間……

網民K：我都係30歲先嚟讀master轉行，如果你真係想咁做，我會建議你越早開始越好！而家轉咗行，人工都叫還可以，信樓主一樣可以好似我咁。