事主：我之前返過2份工，2位舊上司都對我好好，同埋讚我工作能力好高，離職嗰陣仲寫滿晒成版A4紙嘅reference letter畀我。但而家呢份新工，我全部上司都係老海鮮嚟，佢哋每日就準時收工，有時收工仲會send email畀嘢我做，吩咐我第二朝要畀到佢哋，搞到我日日都要OT。

暫時返咗5個月，上司話我有好多careless mistake，做嘢又唔上心，所以決定延長我試用期，仲要做每月檢討，只要我無任何改善就會即刻炒我。想問吓大家會即刻遞信，定係會照做落去。

網民A：你全部上司準時走，你應該照跟佢哋準時走，收工時間有task畀你就留返第二日先做。

網民B：延長試用期係想你自己辭職，唔想因為公司炒你而影響你CV。

網民C：點都要搵定工先，喺上司眼中，對你印象已經好差，之後佢只會越嚟越睇你唔順眼。

網民D：如果只係小錯，一般公司都認為你會有改善空間，又點作為延長試用期嘅理由？如果你上司講嘅小錯其實係一啲好嚴重嘅錯誤，佢哋又點解唔即刻炒咗你？結論係你上司搵緊辦法逼你走，但同時間佢又未搵到人頂替你個位，如果你決定留低繼續做，佢點都會有方法逼你自己辭職，所以早啲辭職啦。

網民E：辭職算啦，你留喺呢間公司唔會有好日子過。

網民F：通常延長試用期之後，下一次嘅review probation都唔會係好結果。如果你選擇留低，要有心理準備隨時畀人炒，特別而家市況唔好，好多公司都對headcount好審慎。

返工就好似拍拖咁，都係人夾人。同上司夾嘅話，就算你出7成力佢都會對你讚不絕口；唔夾嘅話就算工作能力99分，喺佢眼中都係強差人意，所以樓主唔應該妄自菲薄同浪費時間。

網民G：你話前2份工都畀上司讚，我諗你工作能力應該唔會太差。既然有能力，點解唔搵過另一份工。有能力嘅人係人揀工，而唔係工揀人！

網民H：睇你覺得上司係咪好有誠意教你，如果你覺得佢係有心教嘅盡量跟佢要求改。不過，有好多上司口講一套，背地裏做另一套。

網民I：曾經聽過一個老海鮮講，你同上司唔夾係你問題，唔識改變自己遷就上司。返工真係人夾人，唔夾嘅話就搵第2份工啦，無謂辛苦自己。

網民J：樓主你做過幾份工都無問題，但得而家呢份有。即係問題唔係你身上，想留低畀你上司繼續折磨？

網民K：我試過返新工，所有工作流程跟足以前同事做法，但上司話做得唔啱，每日雞蛋裏挑骨頭，雙重標準。因為佢唔清晰嘅指示，搞到我晚晚OT，佢仲要以為我日日返工都好得閒，不斷畀好多嘢我跟，最後頂唔順辭職。