【職場兩性】男朋友搶到演唱會飛 點知話同女同事兩個人去睇…

事主：「佢好開心咁WhatsApp我話搶到飛，我見係兩張飛，我仲以為有張係留畀我，點知！佢話係同女同事去睇（冇事前提過）！話係今朝一齊睇吓搶唔搶到飛，然後得佢成功，兩個都想去就一齊睇，話普係通同事，叫我唔使擔心……帽事嘅，只不過係冇問過我、只不過係一齊搶飛、只不過係睇同一場演唱會、只不過是座位連埋一齊……帽事嘅……」

網民：「唔識避嫌只有0次和無數次，睇路。」
網民：「就算同同事睇，應該事先都同你講聲……」
網民：「如果佢兩個本身都係鍾意呢個星都……不過都係唔好。」
網民：「笑死，諗起個ex話有個女仔朋友幫佢搶到my little airport嘅飛，平時完全唔會講自己去邊嘅人，竟然開口話個女仔同佢唔同場，係後面先搶到佢張飛，仲拍片報備，知咩事啦！」
網民：「嘩！如果我男朋友咁樣，我一定會好唔開心！根本搶飛就冇得一齊搶！如果只限買兩張，就分開各自各啦！」
網民：「我之前好想睇蘇打綠，都有叫同事幫我一齊搶，但大家都係搶完自己嘅先幫其他人，咁樣咪好囉。我覺得如果嗰個女同事都覺冇問題，佢就真係有問題啦！同人哋男朋友去睇演唱會，佢有冇事呀？」
網民：「作為一個成熟大人，見你男友一開始咁開心，似乎佢真係天然呆嗰種，真心想去睇演唱會。可能佢同個女同事都一樣對個星係真愛，你陪佢去睇，你又enjoy唔到個演唱會，可能仲唔開心呢，不如信佢一次？」
網民：「痴線！我係你男朋友就話女朋友都想一齊睇，叫個女同事自己上網搵其他人放飛啦！」
網民：「男朋友同嗰個女同事都好唔識做，一係男朋友蠢，一係就個女同事都有意。」
網民：「有冇搞錯！我一定會勁嬲勁失望囉！」
網民：「如果調返轉又點睇？如果係女朋友搶到飛，然後話同個男同事去睇，大家會唔會又覺得易接受啲？」
網民：「嗰個女同事有冇男朋友？」
網民：「但我覺得提出『兩個都想去就一齊睇』嘅嗰一個，相當有問題囉！」