事主：「我公司有個年過50歲嘅女同事，呢位老海鮮返工成日搵人講嘢，講佢每日公司或者屋企發生嘅事。一開口就不停講，迫其他同事聽嗰種……仲要全部都係負面嘢！寬己嚴人，每個同事喺佢眼中都係垃圾，唯獨講到佢自己，就話自己好勤力同好負責任，全公司啲嘢佢做晒……

又成日講公司對佢好差，疫情幾年冇加過人工。日日係咁鬧，但佢又唔會走……成班同事都覺得佢好煩，但公司好怕請人，所以老闆唔點理佢。大部分同事依家都盡量避佢，唔想同佢有接觸，勁難頂，可以點做？」

網民A：講到咁差！？呢啲人留喺公司冇作為，點解你老闆可以容忍佢……

網民B：我公司都有個咁嘅同事，成日話自己好忙多嘢做，但又得閒周圍吹水、講人壞話，日日返工對住呢啲人，其實好煩好影響心情。

網民C：呢啲人成日無做嘢，但就講大話，講已經做緊。人哋叫佢做嘢，自己唔記得，就話人哋無講，對住呢類人要全部email來往，留證據。

網民D：試吓全世界夾埋唔理佢，睇吓佢會唔會自動收聲。不過有啲人自言自語都可以好興奮。

網民E：耳機大法幫到你，全程無視呢個人，享受自己世界。

網民F：公司嘢都算，好心屋企嘢就唔好講啦。

網民G：一係佢走，一係你走。佢多數做到退休，點計最後你走嘅可能性最大。

網民H：聰明人開心做法，永遠唔好同佢爭論！唔理三七二十一乜都話「你講得啱！」講到佢唔理你為止。

網民I：貼大字報！大大隻字寫，請將音量收細！守護辦公室寧靜，人人有責！佢走過嚟就用手指住啲字。