事主：「前幾日我上司因為接到個電話，佢匆匆忙忙咁出門，枱面上面嘅嘢都未完全整理好。因為我要放啲文件去佢枱面，唔覺意見到佢本筆記簿上面嘅內容。嗱，我真係唔係故意，要侵犯我上司私隱，邊個叫佢本筆記簿就咁攤喺枱，搞到我睇到晒佢寫嘅內容。

裡面係寫住某個即將唔做嘅同事，從佢入職到而家犯過咩錯，包括佢唔小心恰着咗嘅事等等。雖然我有睇其他內容，但單係睇到嘅內容已經令人好無語，因為上面時間同地點都寫得好清楚，難怪我上司對其他同事犯過嘅錯都記得一清二楚，因為咁每年Appraisal，佢都會翻舊帳，甚至係離咗職好耐嘅前同事，佢成日都會同我哋舊事重提。

原來佢有一本針對我哋嘅『死亡筆記』，專門記低我哋做錯嘅事，如果惹佢唔高興，佢就會針對嗰啲事開刀，甚至向上面告狀，而且我信嗰本簿都記低咗唔少其他部門主管得罪佢嘅事，畢竟佢成日都講其他部門主管嘅嘢？

假如我上司可以寫『死亡筆記』嘅一半心力，放喺做嘢上面，或者其他人唔會對佢反感，甚至合作嘅廠商都會願意同佢有更多溝通。」

網民回應：

A/真係充滿負能量。同意樓主咁講，如果佢可以將一半心力放喺做嘢上面，對佢自己同其他同事，甚至公司都好。

之前我做管理階層嗰陣，我係好努力咁記低每個同事做過咩好事，努力幫佢哋搵吓有咩位值得讚。令同事會因為被鼓勵而覺得開心，可以帶住呢種心情做嘢。我相信比起因為怕畀人鬧而戰戰兢兢工作，效率同表現都會更好。

B/最後一句睇得出係啲客都唔想同佢傾嘢，記低人做錯咩冇咩問題，但如果好似怨婦咁記仇，記好多年咁就……

C/將已經冇做嘅人都拎出嚟講，翻舊帳，代表佢個人好小心眼，難聽啲講，今人睇一個人唔順眼，連透啖氣都有錯。

D/你都可以記低上司有啲咩做錯，遲吓有咩事可以用嚟做談判籌碼。

E/咁你上司要做Appraisal，記低都好正常啫。

F/你錯過咗將佢踢走嘅機會啦，你應該將本筆記嘅內容唔小心流出去畀其他部門嘅主管呀嘛。

G/做好自己本份，咁就唔使驚啦。

H/實話實說，你真係太唔了解職場，本身做呢啲Appraisal就係要有證有據，如果冇啲例子做證，反而仲得人驚，件事會變到好主觀。我寧願我上司係呢種人，我做錯咩都一目了然。

I/我覺得記錄好正常，搵機會溝通都合理，但唔使翻舊帳，我自己都會記低同事有咩做得唔好，同時都會記低好嘅事，等做Appraisal嗰陣可以唔係一味讚，而係可以畀對方知道有咩可以改善。