事主：「話說上星期，HR同我講，話我畀人炒咗，大叔我今年38歲，結咗婚，有1個小朋友，有房貸在身。我喺公司係一個中階主管，以前月入7萬台幣（約17,874港幣）左右，公司係中型企業，前年開始虧損，我同同事都知公司會唔掂，只係唔知道會咁快。

而家覺得好頭痛，係唔知我嚟緊要點就業，份糧好難同之前比，我唔想由底層做起，目前係靠儲落嘅錢同太太嘅收入養家，太太嘅收入有5萬台幣（約12,767港幣），而我仲係待業中，面子已經唔係重點，重點只係我想快啲開始做返嘢，好在我太太話無論如何都會支持我。

我其實唔想因為失業累到屋企人，但又好難先搵到份同之前人工差唔多嘅工，我一直好努力喺求職網站上面搵，只能夠講真係心好累。」

網民回應：

A/我係2022年公司執笠，42歲有2個小朋友，當時我年薪有100萬台幣（約255,345港幣），老婆月薪6萬台幣（約15,320港幣）。公司執咗之後，一開始我搵到份3萬台幣月薪嘅工（約7,660港幣）嘅工，4個月之後，搵到目前公司嘅工，年薪90萬台幣（約229,810港幣）。只要有能力，就夠慢慢找適合的公司。

B/唔好去送外賣，留得喺中型公司仲要收7萬台幣（約17,874港幣）人工，代表你能力唔錯，外賣只會消耗你嘅時間同內心，真係唔啱你。

問吓自己、老婆，還有以前同事和上級，你強項係咩？再去揀嘢做，能力好唔怕冇嘢做，人工低又有咩所謂？再繼續揀下一份更高嘅工作。有你嘅伴侶、小朋友，會令變得更強大，會令你有信心成功！

C/面子唔係問題，又唔想從低做起，咩邏輯。

D/台灣只係得畀人炒同未畀人炒，冇幾間公司會養員工到退休，你就算搵到份工，過幾年都係要搵一次，你一邊搵一邊認真思考吓。

E/你可以試吓諗照顧老人家方面諗，呢行好缺人，絕對唔會失業，啱啱開始會好辛苦，但耐咗憑你嘅努力，做主管應該唔係問題，加油！唔好灰心！

F/你係失業啫，又唔係畀人呃，你至少仲有錢，畀人呃仲要係一蚊都冇，我覺得唔好眼高手低，只要可以做，去做住先。

G/我40歲，之前年薪有120萬台幣（約306,414港幣），有2個小朋友，又有房貸，公司覺得我賺太多，所以炒咗我......我而家係自己做生意，做老闆，有咩好驚？

H/38歲，你仲好後生啫，只係人工冇咁高，仲會攰啲咁。