事主：自從我生咗小朋友之後，我就放好多時間喺佢哋身上，日日都想準時放工，所以事業呢幾年基本上係停擺咗，完全無升過職。但眼見身邊差唔多年紀嘅人，甚至後生過我嘅都已經高級過我，令到我心理好唔平衡。

我覺得自己能力唔會比佢哋低，所以有時又會想放返多啲時間喺事業上，但因為你要準時放工，上司已經將你定義為「打份工」系列，因為知道你唔chur得，返屋企亦唔會同佢OT。想問吓事業同家庭係咪好難兼顧？

網民A：係。你要準時放工，老細眼中你嘅拼勁一定無其他同事高。

網民B：人係因為有太多慾望，所以先會煩惱！你要問吓自己邊樣嘢最重要! 公司無咗你，唔夠一分鐘已經搵到人取代你，小朋友無咗你又得唔得？確實如果小朋友仲細，你係要花多啲時間喺佢身上，呢個階段根本唔使多諗！我都經歷過呢個階段，但我唔會同人哋比較，因為時間就係得咁多，自然就要取捨！工作同家庭無出任何大亂，已經叫兼顧得好好啦！

網民C：如果份工唔係睇能力，而係睇邊個遲收工先決定有無得升職，呢間公司都係有問題。

網民D：其實最緊要識理財，顧得掂啲錢。升職、返工講到尾都係因為錢。只要你儲到夠錢退休，虛名呢啲其實唔太重要。

網民E：有得必有失，睇吓你覺得邊樣重要啲。生咗小朋友之後，我基本上都係做兼職，想多啲時間陪佢哋，到佢哋讀中學嗰陣我都做過一段時間全職，後來因為頂唔順辦公室政治就無再做，又做返兼職咁。

可能我無咩事業心，又唔需要我幫手賺錢養家，所以都會以家庭為重。特別係陪小朋友成長呢啲機會係無得重新嚟過，而家佢哋都算平穩度過青春期，甚至唔覺得佢哋有反叛期呢樣嘢，又同我哋關係好好，呢啲嘢有錢都買唔到。

網民F：呢個都無辦法，花時間經營一邊，另一邊自然就會少咗時間經營。選擇嚟，你唔後悔就得啦！

網民G：呢個係全世界女打工仔遇到嘅難題，真係唔可以雙贏……

網民H：當你小朋友大啲，你就可以喺事業上再努力衝吓！

網民I：如果你有一個好老公，平日肯分擔照顧小朋友嘅話，就可以兼顧到。

網民J：其實好睇你有無好嘅老細，我親身際遇係雖然要啲時間，但有實力嘅話最終都會升到職。當年我小朋友仲讀緊幼稚園至初小期間，我事業都係停滯不前。後來機緣巧合，我調咗職跟到舊老細，佢好睇好我，而我小朋友都開始大，所以可以放返多啲時間喺工作到，然後就有得升職加薪。所以我覺得有實力總有機會。

網民K：你同工作狂比，梗係會好挫敗啦！