事主：「通常難為女人嘅都係女人。

有次女同事M痛，連男人見到都覺得病，見佢面青口唇白，個個都叫佢早退，佢個人責任心重，諗住捱多陣等老細返嚟，同佢交代埋啲嘢先走。

點知老細返嚟就話好小事，話自己M痛都唔使請假，叫導師出去買止痛藥返嚟就冇問題，仲懶大方話公司出錢（啲藥$25）女同事表示想返屋企休息多過食藥，但老細就話佢仲有好多嘢要做，『建議』佢食藥先。呢個故事教訓大家，早退都係早走早着，遇着個冇良心嘅老細，唔放人就GG。」

網民回應：

A.聽過一、兩位女上司講「我生完BB，第二日都即刻做嘢開會啦」就好似以前啲女人講「我生完，第二日即刻落地耕田啦」咁。

B.同理心問題。我之前有個男上司，明明佢自己都養4隻貓，我同事（即係佢下屬）啱啱隻狗走咗，朝早WhatsApp咗句請假都講明係因為隻狗走咗，男上司仲可以好厚面皮問佢：你晏晝返唔返？真心有病，白事呀大佬，係咪要呢個時候咁絕問人係請半日定一日？公司又唔係真係咁忙冇咗邊個唔得，你咪由得個同事請足一日唞吓囉，我記得最後個同事係全日都無覆佢呢句WhatsApp。

C.我都試過，由初經痛到而家廿年。有次痛到遲到，同我女上司解釋，佢話個個女人都會M到㗎啦，我忍唔住反駁「咁係咪個個都唔會M痛？」佢即刻收聲，之後有次嚴重到要入院輸血，住咗2日就唔冇再話我。

D.有好多女人其實都只係靠欺負其他女人去上位，要識得分辨出來，同埋遠離呢啲鬼。

E.老細見到你出現到係公司會覺得你冇事，唔會理你狀況。所以有唔舒服打死都唔好返工，自己拎嚟唔開心。

F.因為同為女人，佢哋覺得自己冇問題，人哋都無問題，但明明每個人情況都唔同。

G.止痛藥對M痛根本就冇用。

H.其實痛住好難做到嘢。

I.我嗰陣入產房，女醫生檢查係粗暴過男嘅好多。

J.試過有同事嚟M係會痛到嘔，食藥都搞唔掂，喺隔籬望住都覺得辛苦。

K.試過男上司叫我早退，佢話佢老婆會暈低嗰種嚟，所以佢十分體諒……get到你M痛唔舒服嘅，多數都係有老婆嘅男上司……女上司多數只會叫你食止痛藥。

L.我試過無數次係咁，次次嚟親M，都會地獄痛，又會嘔，唔止M痛，胃都會好痛，以前細個返工唔懂事，諗住頂到就頂，大個之後諗通咗，每次見工我一定會講明，每個月好大機會會請病假，請就請，唔請就罷。我嚟M好準時，同時又好地獄，開始一份新工之前一定會講，費事畀人情緒勒索。

M.千萬唔好expect上司會有同理心，作為主管只可以公事公辦！ 建議M痛同事立刻請sick leave，拎手袋走，後補醫生紙！