事主：今日屯門公路塞車，我10:34am行到入公司門口，跟住老細同我講話10:30am之後當曠工。我真係好無語！點解佢會覺得我控制得到公路塞車？仲要係我已經講明咗塞車會遲到，點解公司唔可以體諒一吓？跟住嗰刻我已經好想走，因為我而家走同7點放工先走冇分別，都係一樣都唔計我今日嘅錢。合約係有寫明10:30am後返工當曠工，但係我有合理嘅理由返唔切，同埋我一早已經講咗塞車。跟住我嗰個好好人嘅主管叫我忍一忍，最尾我都係做埋嘢留到7點平時放工時間先走，但係我真係唔知我冇錯點解要忍？而家真係好後悔冇嗰吓即時走！

網民A：下次直接睇醫生拎4日病假，就算冇有薪病假，起碼放假有5分之4嘅糧。

網民B：勞工法例冇遲到曠工呢樣嘢，你返幾耐佢都係要出返糧畀你，最多即炒，但係唔可以照返工又當曠工計，呢方面你唔使擔心。不過都咁講，員工遲到即使你有合理解釋，唔代表人哋要接受，人哋請你係畀錢去買你嘅能力同時間。

網民C：曠工，即係冇返工，冇返工即係直接收工啦！

網民D：所以當咗你曠工，你都照返全日？

網民E：我明，噚日我呢隻屯門牛都係10點先返到，但我公司有事故證明就冇事，換過間公司啦！

網民F：未過試用期就快啲辭職啦！

網民G：佢當你曠工嗰吓，就話心口痛唔舒服，要去睇醫生，即刻變病假唞返兩日，仲同佢講咁多？呢啲伏工，早走早着，唔使嬲。

網民H：如果合約係咁寫就難搞，合約有寫雙方都有責任遵從，如果覺得合約不合理，唯一做法係入稟法庭宣告合約無效。勞工處都應該冇法庭權力單方面可以廢除僱傭合約。

網民I：留低你有返工又當曠工嘅證據，例如打卡同出糧記錄，辭職之後上勞工處幫你追討。

網民J：呢啲公司算吧啦，可能根本想搵藉口炒你啫。